Frå idé til vekst: Slik kan samarbeid og sterke team drive innovasjon i Stryn

Notat frå Innom med Bram Timmermans

Alle foto: Christer Lunde Solberg/Stryn Næringshage

Den 28. februar arrangerte Stryn Næringshage og Stryn Næringssamskipnad Innom – ein viktig møteplass for næringslivet i Stryn. Denne gongen fekk vi besøk av professor Bram Timmermanns frå Handelshøyskolen i Bergen, Institutt for strategi og leiing, som delte verdifull innsikt kring korleis ein kan gå frå idé til vekst gjennom å byggje sterke team og fremje innovasjon.

Samarbeid som nøkkel til verdiskaping

Eit sentralt tema i foredraget var kor viktig samarbeid er for å skape vekst og innovasjon – ikkje berre internt i bedrifter, men også mellom ulike aktørar på tvers av bransjar og geografi. Timmermanns trekte fram fleire aspekt ved samarbeid som kan styrke både nystarta og etablerte verksemder:

• Lokal verdiskaping gjennom samarbeid
Eit godt døme på korleis samarbeid kan skape økonomisk og kulturell vekst, er suksesshistorien til Yngve Bergqvist, gründeren bak Icehotel i Sverige. Gjennom å knyte seg tett opp til lokale aktørar, frå kunstnarar til reiselivsverksemder, har han skapt ei global merkevare. Denne modellen kan overførast til mange andre næringar og regionar, inkludert Stryn. Lodgen Stryn ble omtala av Timmermans som eit lokalt døme på dette, da også Lodgen Stryn har vist korleis ein kan tenkje nytt gjennom samarbeid med lokale aktørar og utvikling av heilskaplege opplevingar for både gjestar og lokalmiljø. Både Lodgen og Icehotel viser at innovasjon ofte spring ut av lokalt samarbeid, der ein kombinerer eksisterande ressursar med kreative idear.
Bærekraft og miljøbevisstheit i samarbeid
Timmermanns understreka at samarbeid også kan bidra til meir berekraftige løysingar. Når ulike aktørar kjem saman, kan dei finne innovative måtar å redusere miljøpåverknad på, slik Icehotel har gjort med solcelledriven kjøling og bevaring av Torneelva.

Entreprenørskap: Frå idé til vekst

For gründerar og småbedrifter handlar innovasjon om å navigere i eit landskap prega av usikkerheit og avgrensa ressursar. Timmermans tok utgangspunkt i professor Saras Sarasvathy si Effectuation-teori, som legg vekt på å handle strategisk basert på dei ressursane ein har tilgjengeleg, heller enn å vente på perfekte omstende.

Han poengterte også at entreprenørskap sjeldan følgjer ein lineær veg – det handlar om kontinuerleg læring og iterasjon. Viktige faktorar for suksess er:

Å bruke eksisterande ressursar smart
Å teste idear raskt og lære av responsen
Å handle proaktivt heller enn å vente på ein ferdig plan

Korleis etablerte bedrifter og startups kan skape innovasjon saman

Timmermans diskuterte kvifor samarbeid mellom startups og etablerte bedrifter ofte er utfordrande, men også svært verdifullt. Han viste til at 52 % av norske verksemder har vore involverte i alliansar og partnerskap dei siste tre åra, og at slike samarbeid blir stadig viktigare.

Ei lyttande forsamling fekk gode inspel om innovasjon og samarbeid.

For etablerte bedrifter kan samarbeid med startups føre til raskare innovasjon og nye løysingar. Samtidig kan startups dra nytte av dei ressursane og erfaringane som større bedrifter har. Likevel er det fleire utfordringar som kan hindre suksessrike samarbeid:

Ulike forventningar og strategiar – Store bedrifter kan mangle ein klar plan for samarbeidet, medan startups kan ha urealistiske forventningar.
Kommunikasjonsutfordringar – Manglande felles forståing av kultur og arbeidsmåtar kan føre til misforståingar.
Struktur og fleksibilitet – Store bedrifter kan ofte vere treigare i avgjerdsprosessar, medan startups treng rask utvikling.

For å lykkast med samarbeid må begge partar vere opne for læring, kommunisere tydeleg og ha ein strukturert tilnærming til partnarskap.

Bygging av ein sterk samarbeidstradisjon

Timmermans oppfordra næringslivet i Stryn til å satse endå meir på møteplassar der gründarar, etablerte bedrifter, offentlege aktørar og andre næringslivsaktørar kan møtast for å dele kunnskap og ressursar. Innovasjon skjer ikkje i eit vakuum – det blir skapt gjennom relasjonar og felles innsats.

I ei tid med store omstillingsbehov er samarbeid mellom ulike aktørar ikkje berre ønskjeleg, men heilt nødvendig. Innovasjon handlar om å våge å tenkje nytt, byggje sterke team og utforske nye forretningsmodellar saman.

👉 Vil du vere med på å forme framtida for næringslivet i Stryn? Følg med på kommande arrangement https://www.facebook.com/strynNH og bli med i samtalen!