Strynsk ja-kultur, kreativ galskap og historier som inspirerer
Gründer Simen Staalnacke
Notat frå Innom med Simen Staalnacke
Alle foto: Christer Lunde Solberg/Stryn Næringshage
Fredag morgon fekk vi på Innom i Stryn storfint besøk då Simen Staalnacke, kjend som ein av grunnleggjarane bak Moods of Norway, tok turen innom for å dele frå sitt gründerliv. Den fullsette salen fekk høyre ei både artig og lærerik forteljing frå eit liv i kreativitet, motgang og suksess – og ikkje minst ein god dose strynsk galskap.
«Moods var eit crazy-bananas-opplegg,» sa Staalnacke med eit smil, og tok oss med tilbake til starten av det som skulle bli eit av Noregs mest fargerike og populære klesmerke. Ideen blei klekt ut på eit nachspiel på Hawaii, og endte med 40 butikkar, 400 tilsette og 420 millionar i omsetning – utan éin einaste ekstern investor. Og ja, dei fekk nesten 13 prosent av den norske marknaden for vaffeljern.
Men det var meir enn tal som imponerte. Staalnacke sette ord på noko vi i Stryn kjenner oss godt igjen i: kultur for samarbeid, hjelpsamheit og pågangsmot. «I Stryn er ein veldig flinke til å hjelpe kvarandre. Det er ein utruleg bra ‘ja-kultur’ her,» sa han – og det fekk vi kjenne på denne fredagen òg.
Gjennom foredraget fekk vi høyre om viktigheita av å skilje seg ut, å ha det moro, og å tru så sterkt på prosjektet sitt at andre ikkje kan unngå å bli smitta av entusiasmen. Moods of Norway blei ikkje berre eit klesmerke – det blei ei forteljing. Frå jakker med spelebrett i innerforet til fuglekasser i superundertøy-emballasje – det handla om å gi produkta substans og personlegdom.
Staalnacke snakka óg ope om nedturen, om kva som skjer når vekst går for fort, og når eit selskap blir for stort til at engasjementet held følgje med strukturane. – Alt blir ein redningsaksjon, sa han, og understreka viktigheita av å kunne stoppe opp, kalibrere og tørre å omstille.
Etter Moods har Staalnacke halde fram med å bruke kreativiteten sin til nye prosjekt. Han har designa glas for Magnor, utvikla boblejakker av resirkulert plast og dun (White:Space), som seinare blei kjøpt av snowboardlegenda Shaun White, og står bak klesmerket Eliteserien Icons – inspirert av norske fotballklubbar.
Han minna oss på at suksess ikkje kjem lett. – Det er aldri noko «walk in the park». Men sjekklista på kva som trengst for å lukkast, er ofte den same – uansett om du er gründer i Stryn eller Silicon Valley.
Tusen takk til Simen Staalnacke for eit inspirerande, ærleg og engasjerande føredrag. Du minna oss på krafta som ligg i entusiasme, historieforteljing og det å tørre å gå sine eigne vegar – og vi i Stryn går gjerne nokre steg til i lag.